ភ្នំពេញ៖ នាយករដ្ឋមន្ត្រី សម្តេចធិបតី ហ៊ុន ម៉ាណែត បានជំរុញដល់ឯករដ្ឋរាជទូតកាណាដាលោកស្រី ពីង គិតនីកន ធ្វើយ៉ាងណាជំរុញអ្នកវិនិយោគកាណាដាមកវិនិយោគកម្ពុជាដោយបានលើកឡើងពីសក្ដានុពលរបស់កម្ពុជាដែលនឹងផ្ដល់អត្ថប្រយោជន៍ដល់ធុរជន។

ក្នុងជំនួបនៅវិមានសន្ដិភាពថ្ងៃទី១៣ ខែឧសភា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានបញ្ជាក់ជូនឯកអគ្គរដ្ឋទូតកាណាដាអំពីគោលនយោបាយទាក់ទាញ និងលើកទឹកចិត្តវិនិយោគិននៅកម្ពុជា តាមរយៈការអនុវត្តច្បាប់ស្តីអំពីវិនិយោគនៃព្រះរាជាណាចក្រកម្ពុជា ក៏ដូចជាការដាក់ចេញនូវគោលនយោបាយជាក់ស្ដែង ដើម្បីគាំទ្រដល់បរិយាកាសវិនិយោគ និងរក្សាភាពប្រកួតប្រជែងរបស់កម្ពុជា ទាំងក្នុងក្របខ័ណ្ឌតំបន់ និងសកលលោក។ ទន្ទឹមនោះ សម្ដេចធិបតីក៏បានគូសរំលេចអំពីការដាក់ចេញនូវគោលនយោបាយ និងយន្តការបន្ថែមទៀតក្នុងការគាំទ្រ និងដោះស្រាយនូវបញ្ហាប្រឈមនានារបស់វិនិយោគិននៅកម្ពុជា តាមរយៈការរៀបចំនូវវេទិការវាងរាជរដ្ឋាភិបាល-ផ្នែកឯកជន និងការបង្កើតក្រុមការងារតាមដានលើការអនុវត្តគោលនយោបាយ វិធានការ និងការស្វែងរកដំណោះស្រាយចំពោះបញ្ហាប្រឈមនានា របស់វិនិយោគិន។

សម្ដេចថាថា បច្ចុប្បន្ននេះសភាពាណិជ្ជកម្មកម្ពុជាបានបង្កើតនូវតំណាងសភាពាណិជ្ជកម្មនៅប្រទេសកាណាដា ដែលជាផ្នែកមួយនៃការភ្ជាប់ទំនាក់ទំនង និងកិច្ចសហប្រតិបត្តិការលើវិស័យពាណិជ្ជកម្ម និងវិនិយោគរវាងប្រទេសទាំងពីរ។

លោកស្រីឯកអគ្គរដ្ឋទូត ពីង គិតនីកន បានបញ្ជាក់អំពីការពេញចិត្តចំពោះទំនាក់ទំនងការទូតជាប្រវត្តិសាស្រ្ត និងកិច្ចសហប្រតិបត្តិការល្អ រវាងកាណាដា-កម្ពុជា ដែលជាទំនាក់ទំនង និងកិច្ចសហប្រតិបត្តិការប្រកបដោយផ្លែផ្កា ហើយក្នុងអាណត្តិការទូតនៅកម្ពុជា។ លោកស្រីថានឹងប្តេជ្ញាខិតខំបន្ត ពង្រឹង និងពង្រីកទំនាក់ទំនង និង កិច្ចសហប្រតិបត្តិការ រវាងប្រទេសទាំងពីរឱ្យកាន់តែរីកចម្រើន។

បន្ថែមលើនេះ លោកស្រីបានគោរពជម្រាបជូនសម្តេចធិបតីអំពីការបន្តជំរុញកិច្ចសហប្រតិបត្តិការលើវិស័យពាណិជ្ជកម្ម និងវិនិយោគរវាងកាណាដា-កម្ពុជា ក៏ដូចជាការពង្រឹងការវិនិយោគប្រកបដោយគុណភាពរបស់ក្រុមហ៊ុនកាណាដានៅកម្ពុជាផងដែរ។

សម្តេចធិបតី បានរម្លឹកចំណងការទូតជាង៧០ឆ្នាំរវាងកម្ពុជ និងកាណាដា និងបានថ្លែងអំណរគុណចំពោះរដ្ឋាភិបាល និងប្រជាជនកាណាដា ដែលបានចូលរួមចំណែកក្នុងការកសាងសង្គម-សេដ្ឋកិច្ចកម្ពុជានាពេលកន្លងមក ការកសាងធនធានមនុស្ស ជាពិសេសការបណ្តុះបណ្តាលដល់កងកម្លាំងរក្សាសន្តិភាពមួកខៀវរបស់កម្ពុជា និងការគាំទ្រដល់វិស័យបោសសម្អាតមីន។

ទំនាក់ទំនងទ្វេភាគីរបស់កាណាដាជាមួយកម្ពុជាបានបង្កើតឡើងជាច្រើនទសវត្សរ៍មកហើយ ដែលទាក់ទងនឹងជម្លោះឥណ្ឌូចិន នៅពេលដែលកាណាដាបានចូលរួមក្នុងគណៈកម្មាធិការត្រួតពិនិត្យអន្តរជាតិដែលបានបង្កើតឡើងក្នុងឆ្នាំ១៩៥៤ លើសពីនេះកាណាដាក៏ជាភាគីនៃកិច្ចព្រមព្រៀងទីក្រុងប៉ារីសឆ្នាំ១៩៩១ ដែលបានបញ្ចប់ជម្លោះជាច្រើនទសវត្សរ៍។

កាណាដាគឺជាគោលដៅនាំចេញធំមួយរបស់កម្ពុជា ហើយពាណិជ្ជកម្មទំនិញទ្វេភាគីបានកើនឡើងពី ១,៨ ពាន់លានដុល្លារក្នុងឆ្នាំ២០២១ ដល់ ២,៤ពាន់លានដុល្លារក្នុងឆ្នាំ២០២២។ នេះបើតាមការចុះផ្សាយរបស់ក្រសួងការបរទេសកាណាដា៕